Plattaskipti við skip sem eru að koma í fyrsta sinn til okkar er gömul og góð hefð sem við hjá Faxaflóahöfnum höldum í heiðri. Að þessu sinni var athöfnin um borð í skemmtiferðaskipinu Sky Princess sérlega ánægjuleg, þar sem hún markaði þau tímamót að við værum komin á sama stað og við vorum fyrir heimsfaraldur varðandi komur skemmtiferðaskipa. Samanburður við sama tímabil ársins 2019, sem jafnframt var metár í komu skemmtiferðaskipa í hafnir Faxaflóahafna, sýnir að við erum búin að endurheimta sama fjölda. Jafnframt bendir bókunarstaða ársins 2022 til þess að tæplega 200 skemmtiferðaskip munu koma í Faxaflóahafnir á árinu, sem var sá fjöldi sem kom árið 2019. Samhliða bendir bókunarstaða ársins 2023 til þess að það mun vera um 20% vöxtur í komum skemmtiferðaskipa í Faxaflóahafnir. Af þessu má áætla að áhrifa heimsfaraldurs gætir ekki lengur í þessum efnum og við getum horft til framtíðar á ný.
![](https://www.faxafloahafnir.is/wp-content/uploads/2022/07/Sky-Princess-300x181.jpg)
Á myndinni eru Brian Whelan aðstoðarskiptjóri Sky Princess, Gísli Jóhann Hallsson yfirhafnsögumaður og Sigurður Jökull Ólafsson markaðsstjóri Faxaflóahafna.
![](https://www.faxafloahafnir.is/wp-content/uploads/2022/07/DJI_0827-1-300x200.jpg)
Horft yfir Skarfabakka þar sem liggja að bryggju hvorki meira né minna en þrjú skemmtiferðaskip. Þau eru Sky Princess (fremst), Silver Whisper og AIDA Bella.